।।श्रीदुर्गाष्टोत्तरशतनामस्तोत्रम्।।

।।श्रीदुर्गाष्टोत्तरशतनामस्तोत्रम्।।

(1)
ईश्वर उवाच –
शतनाम प्रवक्ष्यामि शृणुष्व कमलानने ।
यस्य प्रसादमात्रेण दुर्गा प्रीता भवेत् सती ॥१॥

पद-विच्छेद:
ईश्वरः उवाच
शत-नाम प्रवक्ष्यामि शृणुष्व कमल-आनने
यस्य प्रसाद-मात्रेण दुर्गा प्रीता भवेत् सती।

(2)
ॐ सती साध्वी भवप्रीता भवानी भवमोचनी ।
आर्या दुर्गा जया चाद्या त्रिनेत्रा शूलधारिणी ॥२॥

पद-विच्छेद:
ॐ सती साध्वी भव-प्रीता भवानी भव-मोचनी
आर्या दुर्गा जया च आद्या त्रि-नेत्रा शूल-धारिणी।

(3)
पिनाकधारिणी चित्रा चण्डघण्टा महातपाः ।
मनो बुद्धिरहंकारा चित्तरूपा चिता चितिः ॥३॥

पद-विच्छेद:
पिनाक-धारिणी चित्रा चण्ड-घण्टा महा-तपाः
मनः बुद्धिः अहंकारा चित्त-रूपा चिता चितिः।

(4)
सर्वमन्त्रमयी सत्ता सत्यानन्दस्वरूपिणी ।
अनन्ता भाविनी भाव्या भव्याभव्या सदागतिः ॥४॥

पद-विच्छेद:
सर्व-मन्त्र-मयी सत्ता सत्य-आनन्द-स्वरूपिणी
अनन्ता भाविनी भाव्या भव्य-अभव्या सदा-गतिः।

(5)
शाम्भवी देवमाता च चिन्ता रत्नप्रिया सदा ।
सर्वविद्या दक्षकन्या दक्षयज्ञविनाशिनी ॥५॥

पद-विच्छेद:
शाम्भवी देव-माता च चिन्ता रत्न-प्रिया सदा
सर्व-विद्या दक्ष-कन्या दक्ष-यज्ञ-विनाशिनी।

(6)
अपर्णानेकवर्णा च पाटला पाटलावती।
पट्टाम्बरपरीधाना कलमञ्जीररञ्जिनी ॥ ६ ॥

पद-विच्छेद:
अपर्णा अनेक-वर्णा च पाटला पाटला-वती
पट्ट-अम्बर-परीधाना कल-मञ्जीर-रञ्जिनी।

(7)
अमेयविक्रमा क्रूरा सुन्दरी सुरसुन्दरी।
वनदुर्गा च मातङ्गी मतङ्गमुनिपूजिता ॥ ७ ॥

पद-विच्छेद:
अमेय-विक्रमा क्रूरा सुन्दरी सुर-सुन्दरी
वन-दुर्गा च मातङ्गी मतङ्ग-मुनि-पूजिता।

(8)
ब्राह्मी माहेश्वरी चैन्द्री कौमारी वैष्णवी तथा।
चामुण्डा चैव वाराही लक्ष्मीश्च पुरुषाकृतिः ॥ ८ ॥

पद-विच्छेद:
ब्राह्मी माहेश्वरी च ऐन्द्री कौमारी वैष्णवी तथा
चामुण्डा च एव वाराही लक्ष्मीः च पुरुष-आकृतिः।

(9)
विमलोत्कर्षिणी ज्ञाना क्रिया नित्या च बुद्धिदा।
बहुला बहुलप्रेमा सर्ववाहनवाहना ॥ ९ ॥

पद-विच्छेद:
विमल-उत्कर्षिणी ज्ञाना क्रिया नित्या च बुद्धि-दा
बहुला बहुल-प्रेमा सर्व-वाहन-वाहना।

(10)
निशुम्भशुम्भहननी महिषासुरमर्दिनी।
मधुकैटभहन्त्री च चण्डमुण्डविनाशिनी ॥ १० ॥

पद-विच्छेद:
नि-शुम्भ-शुम्भ-हननी महिष-असुर-मर्दिनी
मधु-कैटभ-हन्त्री च चण्ड-मुण्ड-विनाशिनी।

(11)
सर्वासुरविनाशा च सर्वदानवघातिनी।
सर्वशास्त्रमयी सत्या सर्वास्त्रधारिणी तथा ॥ ११ ॥

पद-विच्छेद:
सर्व-असुर-विनाशा च सर्व-दानव-घातिनी
सर्व-शास्त्र-मयी सत्या सर्व-अस्त्र-धारिणी तथा।

(12)
अनेकशस्त्रहस्ता च अनेकास्त्रस्य धारिणी।
कुमारी चैककन्या च कैशोरी युवती यतिः ॥ १२ ॥

पद-विच्छेद:
अनेक-शस्त्र-हस्ता च अनेक-अस्त्रस्य धारिणी
कुमारी च एका-कन्या च कैशोरी युवती यतिः।

(13)
अप्रौढा चैव प्रौढा च वृद्धमाता बलप्रदा।
महोदरी मुक्तकेशी घोररूपा महाबला ॥ १३ ॥

पद-विच्छेद:
अप्रौढा च एव प्रौढा च वृद्ध-माता बल-प्रदा
महा-उदरी मुक्त-केशी घोर-रूपा महा-बला।

(14)
अग्निज्वाला रौद्रमुखी कालरात्रिस्तपस्विनी।
नारायणी भद्रकाली विष्णुमाया जलोदरी ॥ १४ ॥

पद-विच्छेद:
अग्नि-ज्वाला रौद्र-मुखी काल-रात्रिः तपस्विनी
नारायणी भद्र-काली विष्णु-माया जल-उदरी।

(15)
शिवदूती कराली च अनन्ता परमेश्वरी।
कात्यायनी च सावित्री प्रत्यक्षा ब्रह्मवादिनी ॥ १५ ॥

पद-विच्छेद:
शिव-दूती कराली च अनन्ता परम्-ईश्वरी
कात्यायनी च सावित्री प्रत्यक्षा ब्रह्म-वादिनी।

(16)
य इदं प्रपठेन्नित्यं दुर्गानामशताष्टकम्।
नासाध्यं विद्यते देवि त्रिषु लोकेषु पार्वति ॥ १६ ॥

पद-विच्छेद:
यः इदम् प्रपठेत् नित्यम् दुर्गा-नाम-शत-अष्टकम्
न असाध्यम् विद्यते देवि त्रिषु लोकेषु पार्वति।

(17)
धनं धान्यं सुतं जायां हयं हस्तिनमेव च।
चतुर्वर्गं तथा चान्ते लभेन्मुक्तिं च शाश्वतीम् ॥ १७ ॥

पद-विच्छेद:
धनम् धान्यम् सुतम् जायाम् हयम् हस्तिनम् एव च
चतुः-वर्गम् तथा च अन्ते लभेत् मुक्तिम् च शाश्वतीम्।

(18)
कुमारीं पूजयित्वा तु ध्यात्वा देवीं सुरेश्वरीम्।
पूजयेत् परया भक्त्या पठेन्नामशताष्टकम् ॥ १८ ॥

पद-विच्छेद:
कुमारीम् पूजयित्वा तु ध्यात्वा देवीम् सुर-ईश्वरीम्
पूजयेत् परया भक्त्या पठेत् नाम-शत-अष्टकम्।

(19)
तस्य सिद्धिर्भवेद् देवि सर्वैः सुरवरैरपि।
राजानो दासतां यान्ति राज्यश्रियमवाप्नुयात् ॥ १९ ॥

पद-विच्छेद:
तस्य सिद्धिः भवेत् देवि सर्वैः सुर-वरैः अपि
राजानः दास-ताम् यान्ति राज्य-श्रियम् अवाप्नुयात्।

(20)
गोरोचनालक्तककुङ्कुमेन सिन्दूरकर्पूरमधुत्रयेण।
विलिख्य यन्त्रं विधिना विधिज्ञो भवेत् सदा धारयते पुरारिः॥२०॥

पद-विच्छेद:
गो-रोचना-अलक्तक-कुङ्कुमेन
सिन्दूर-कर्पूर-मधु-त्रयेण
विलिख्य यन्त्रम् विधिना विधि-ज्ञः
भवेत् सदा धारयते पुर-अरिः

(21)
भौमावास्यानिशामग्रे चन्द्रे शतभिषां गते।
विलिख्य प्रपठेत् स्तोत्रं स भवेत् सम्पदां पदम् ॥ २१ ॥

पद-विच्छेद:
भौम-अमावास्या-निशा-अग्रे चन्द्रे शत-भिषाम् गते
विलिख्य प्रपठेत् स्तोत्रम् सः भवेत् सम्पदाम् पदम्।...