।ककारादि काली सहस्र नाम स्तोत्रम्।।

।।ककारादि काली सहस्र नाम स्तोत्रम्।।

ॐ अस्य श्रीसर्वसाम्राज्य मेधाकालीस्वरूप ककारात्मक सहस्रनामस्तोत्र मंत्रस्य महाकाल ऋषिः अनुष्टुप् छंदः श्रीदक्षिण महाकाली देवता ह्रीं बीजं हूं शक्तिः क्रीं कीलकं कालीवरदानाद्यखिलेष्टार्थे पाठे विनियोगः ।

ऋष्यादिन्यासः –
ॐ महाकाल ऋषये नमः शिरसि ।
अनुष्टुप् छंदसे नमः मुखे ।
श्री दक्षिण महाकाली देवतायै नमः हृदये ।
ह्रीं बीजाय नमः गुह्ये ।
हूं शक्तये नमः पादयोः ।
क्रीं कीलकाय नमो नाभौ ।
विनियोगाय नमः सर्वांगे ।

करन्यासः –
ॐ क्रां अंगुष्ठाभ्यां नमः ।
ॐ क्रीं तर्जनीभ्यां नमः ।
ॐ क्रूं मध्यमाभ्यां नमः ।
ॐ क्रैं अनामिकाभ्यां नमः ।
ॐ क्रौं कनिष्ठिकाभ्यां नमः ।
ॐ क्रः करतलकरपृष्ठाभ्यां नमः ।

हृदयादि न्यासः –
ॐ क्रां हृदयाय नमः ।
ॐ क्रीं शिरसे स्वाहा ।
ॐ क्रूं शिखायै वषट् ।
ॐ क्रैं कवचाय हुम् ।
ॐ क्रौं नेत्रत्रयाय वौषट् ।
ॐ क्रः अस्त्राय फट् ।

अथ ध्यानम् ।
करालवदनां घोरां मुक्तकेशीं चतुर्भुजाम् ।
कालिकां दक्षिणां दिव्यां मुंडमालाविभूषिताम् ॥ 1 ॥

सद्यश्छिन्नशिरः खड्गवामोर्ध्वाधः करांबुजाम् ।
अभयं वरदं चैव दक्षिणाधोर्ध्वपाणिकाम् ॥ 2 ॥

महामेघप्रभां श्यामां तथा चैव दिगंबराम् ।
कंठावसक्तमुंडालीगलद्रुधिरचर्चिताम् ॥ 3 ॥

कर्णावतंसतानीत शवयुग्मभयानकाम् ।
घोरदंष्ट्राकरालास्यां पीनोन्नतपयोधराम् ॥ 4 ॥

शवानां करसंघातैः कृतकांचीं हसन्मुखीम् ।
सृक्काद्वयगलद्रक्तधाराविस्फुरिताननाम् ॥ 5 ॥

घोररूपां महारौद्रीं श्मशानालयवासिनीम् ।
दंतुरां दक्षिणव्यापिमुक्तलंबकचोच्चयाम् ॥ 6 ॥

शवरूपमहादेवहृदयोपरि संस्थिताम् ।
शिवाभिर्घोररूपाभिश्चतुर्दिक्षु समन्विताम् ॥ 7 ॥

महाकालेन सार्धोर्धमुपविष्टरतातुराम् ।
सुखप्रसन्नवदनां स्मेराननसरोरुहाम् ।
एवं संचिंतयेद्देवीं श्मशानालयवासिनीम् ॥ 8 ॥

अथ स्तोत्रम् ।
ॐ क्रीं काली क्रूं कराली च कल्याणी कमला कला ।
कलावती कलाढ्या च कलापूज्या कलात्मिका ॥ 1 ॥

कलादृष्टा कलापुष्टा कलामस्ता कलाकरा ।
कलाकोटिसमाभासा कलाकोटिप्रपूजिता ॥ 2 ॥

कलाकर्म कलाधारा कलापारा कलागमा ।
कलाधारा कमलिनी ककारा करुणा कविः ॥ 3 ॥

ककारवर्णसर्वांगी कलाकोटिप्रभूषिता ।
ककारकोटिगुणिता ककारकोटिभूषणा ॥ 4 ॥

ककारवर्णहृदया ककारमनुमंडिता ।
ककारवर्णनिलया ककशब्दपरायणा ॥ 5 ॥

ककारवर्णमुकुटा ककारवर्णभूषणा ।
ककारवर्णरूपा च काकशब्दपरायणा ॥ 6 ॥

कवीरास्फालनरता कमलाकरपूजिता ।
कमलाकरनाथा च कमलाकररूपधृक् ॥ 7 ॥

कमलाकरसिद्धिस्था कमलाकरपारदा ।
कमलाकरमध्यस्था कमलाकरतोषिता ॥ 8 ॥

कथंकारपरालापा कथंकारपरायणा ।
कथंकारपदांतस्था कथंकारपदार्थभूः ॥ 9 ॥

कमलाक्षी कमलजा कमलाक्षप्रपूजिता ।
कमलाक्षवरोद्युक्ता ककारा कर्बुराक्षरा ॥ 10 ॥

करतारा करच्छिन्ना करश्यामा करार्णवा ।
करपूज्या कररता करदा करपूजिता ॥ 11 ॥

करतोया करामर्षा कर्मनाशा करप्रिया ।
करप्राणा करकजा करका करकांतरा ॥ 12 ॥

करकाचलरूपा च करकाचलशोभिनी ।
करकाचलपुत्री च करकाचलतोषिता ॥ 13 ॥

करकाचलगेहस्था करकाचलरक्षिणी ।
करकाचलसम्मान्या करकाचलकारिणी ॥ 14 ॥

करकाचलवर्षाढ्या करकाचलरंजिता ।
करकाचलकांतारा करकाचलमालिनी ॥ 15 ॥

करकाचलभोज्या च करकाचलरूपिणी ।
करामलकसंस्था च करामलकसिद्धिदा ॥ 16 ॥

करामलकसंपूज्या करामलकतारिणी ।
करामलककाली च करामलकरोचिनी ॥ 17 ॥

करामलकमाता च करामलकसेविनी ।
करामलकबद्ध्येया करामलकदायिनी ॥ 18 ॥

कंजनेत्रा कंजगतिः कंजस्था कंजधारिणी ।
कंजमालाप्रियकरी कंजरूपा च कंजजा ॥ 19 ॥

कंजजातिः कंजगतिः कंजहोमपरायणा ।
कंजमंडलमध्यस्था कंजाभरणभूषिता ॥ 20 ॥

कंजसम्माननिरता कंजोत्पत्तिपरायणा ।
कंजराशिसमाकारा कंजारण्यनिवासिनी ॥ 21 ॥

करंजवृक्षमध्यस्था करंजवृक्षवासिनी ।
करंजफलभूषाढ्या करंजवनवासिनी ॥ 22 ॥

करंजमालाभरणा करवालपरायणा ।
करवालप्रहृष्टात्मा करवालप्रियागतिः ॥ 23 ॥

करवालप्रियाकंथा करवालविहारिणी ।
करवालमयी कर्मा करवालप्रियंकरी ॥ 24 ॥

कबंधमालाभरणा कबंधराशिमध्यगा ।
कबंधकूटसंस्थाना कबंधानंतभूषणा ॥ 25 ॥

कबंधनादसंतुष्टा कबंधासनधारिणी ।
कबंधगृहमध्यस्था कबंधवनवासिनी ॥ 26 ॥

कबंधकांचीकरणी कबंधराशिभूषणा ।
कबंधमालाजयदा कबंधदेहवासिनी ॥ 27 ॥

कबंधासनमान्या च कपालमाल्यधारिणी ।
कपालमालामध्यस्था कपालव्रततोषिता ॥ 28 ॥

कपालदीपसंतुष्टा कपालदीपरूपिणी ।
कपालदीपवरदा कपालकज्जलस्थिता ॥ 29 ॥

कपालमालाजयदा कपालजपतोषिणी ।
कपालसिद्धिसंहृष्टा कपालभोजनोद्यता ॥ 30 ॥

कपालव्रतसंस्थाना कपालकमलालया ।
कवित्वामृतसारा च कवित्वामृतसागरा ॥ 31 ॥

कवित्वसिद्धिसंहृष्टा कवित्वादानकारिणी ।
कविपूज्या कविगतिः कविरूपा कविप्रिया ॥ 32 ॥

कविब्रह्मानंदरूपा कवित्वव्रततोषिता ।
कविमानससंस्थाना कविवांछाप्रपूरणी ॥ 33 ॥

कविकंठस्थिता कं ह्रीं कंकंकं कविपूर्तिदा ।
कज्जला कज्जलादानमानसा कज्जलप्रिया ॥ 34 ॥

कपालकज्जलसमा कज्जलेशप्रपूजिता ।
कज्जलार्णवमध्यस्था कज्जलानंदरूपिणी ॥ 35 ॥

कज्जलप्रियसंतुष्टा कज्जलप्रियतोषिणी ।
कपालमालाभरणा कपालकरभूषणा ॥ 36 ॥

कपालकरभूषाढ्या कपालचक्रमंडिता ।
कपालकोटिनिलया कपालदुर्गकारिणी ॥ 37 ॥

कपालगिरिसंस्थाना कपालचक्रवासिनी ।
कपालपात्रसंतुष्टा कपालार्घ्यपरायणा ॥ 38 ॥

कपालार्घ्यप्रियप्राणा कपालार्घ्यवरप्रदा ।
कपालचक्ररूपा च कपालरूपमात्रगा ॥ 39 ॥

कदली कदलीरूपा कदलीवनवासिनी ।
कदलीपुष्पसंप्रीता कदलीफलमानसा ॥ 40 ॥

कदलीहोमसंतुष्टा कदलीदर्शनोद्यता ।
कदलीगर्भमध्यस्था कदलीवनसुंदरी ॥ 41 ॥

कदंबपुष्पनिलया कदंबवनमध्यगा ।
कदंबकुसुमामोदा कदंबवनतोषिणी ॥ 42 ॥

कदंबपुष्पसंपूज्या कदंबपुष्पहोमदा ।
कदंबपुष्पमध्यस्था कदंबफलभोजिनी ॥ 43 ॥

कदंबकाननांतःस्था कदंबाचलवासिनी ।
कक्षपा कक्षपाराध्या कक्षपासनसंस्थिता ॥ 44 ॥

कर्णपूरा कर्णनासा कर्णाढ्या कालभैरवी ।
कलप्रीता कलहदा कलहा कलहातुरा ॥ 45 ॥

कर्णयक्षी कर्णवार्ता कथिनी कर्णसुंदरी ।
कर्णपिशाचिनी कर्णमंजरी कविकक्षदा ॥ 46 ॥

कविकक्षविरूपाढ्या कविकक्षस्वरूपिणी ।
कस्तूरीमृगसंस्थाना कस्तूरीमृगरूपिणी ॥ 47 ॥

कस्तूरीमृगसंतोषा कस्तूरीमृगमध्यगा ।
कस्तूरीरसनीलांगी कस्तूरीगंधतोषिता ॥ 48 ॥

कस्तूरीपूजकप्राणा कस्तूरीपूजकप्रिया ।
कस्तूरीप्रेमसंतुष्टा कस्तूरीप्राणधारिणी ॥ 49 ॥

कस्तूरीपूजकानंदा कस्तूरीगंधरूपिणी ।
कस्तूरीमालिकारूपा कस्तूरीभोजनप्रिया ॥ 50 ॥

कस्तूरीतिलकानंदा कस्तूरीतिलकप्रिया ।
कस्तूरीहोमसंतुष्टा कस्तूरीतर्पणोद्यता ॥ 51 ॥

कस्तूरीमार्जनोद्युक्ता कस्तूरीचक्रपूजिता ।
कस्तूरीपुष्पसंपूज्या कस्तूरीचर्वणोद्यता ॥ 52 ॥

कस्तूरीगर्भमध्यस्था कस्तूरीवस्त्रधारिणी ।
कस्तूरिकामोदरता कस्तूरीवनवासिनी ॥ 53 ॥

कस्तूरीवनसंरक्षा कस्तूरीप्रेमधारिणी ।
कस्तूरीशक्तिनिलया कस्तूरीशक्तिकुंडगा ॥ 54 ॥

कस्तूरीकुंडसंस्नाता कस्तूरीकुंडमज्जना ।
कस्तूरीजीवसंतुष्टा कस्तूरीजीवधारिणी ॥ 55 ॥

कस्तूरीपरमामोदा कस्तूरीजीवनक्षमा ।
कस्तूरीजातिभावस्था कस्तूरीगंधचुंबना ॥ 56 ॥

कस्तूरीगंधसंशोभाविराजितकपालभूः ।
कस्तूरीमदनांतःस्था कस्तूरीमदहर्षदा ॥ 57 ॥

कस्तूरीकवितानाढ्या कस्तूरीगृहमध्यगा ।
कस्तूरीस्पर्शकप्राणा कस्तूरीनिंदकांतका ॥ 58 ॥

कस्तूर्यामोदरसिका कस्तूरीक्रीडनोद्यता ।
कस्तूरीदाननिरता कस्तूरीवरदायिनी ॥ 59 ॥

कस्तूरीस्थापनासक्ता कस्तूरीस्थानरंजिनी ।
कस्तूरीकुशलप्राणा कस्तूरीस्तुतिवंदिता ॥ 60 ॥

कस्तूरीवंदकाराध्या कस्तूरीस्थानवासिनी ।
कहरूपा कहाढ्या च कहानंदा कहात्मभूः ॥ 61 ॥

कहपूज्या कहात्याख्या कहहेया कहात्मिका ।
कहमालाकंठभूषा कहमंत्रजपोद्यता ॥ 62 ॥

कहनामस्मृतिपरा कहनामपरायणा ।
कहपारायणरता कहदेवी कहेश्वरी ॥ 63 ॥

कहहेतु कहानंदा कहनादपरायणा ।
कहमाता कहांतःस्था कहमंत्रा कहेश्वरी ॥ 64 ॥

कहगेया कहाराध्या कहध्यानपरायणा ।
कहतंत्रा कहकहा कहचर्यापरायणा ॥ 65 ॥

कहाचारा कहगतिः कहतांडवकारिणी ।
कहारण्या कहरतिः कहशक्तिपरायणा ॥ 66 ॥

कहराज्यनता कर्मसाक्षिणी कर्मसुंदरी ।
कर्मविद्या कर्मगतिः कर्मतंत्रपरायणा ॥ 67 ॥

कर्ममात्रा कर्मगात्रा कर्मधर्मपरायणा ।
कर्मरेखानाशकर्त्री कर्मरेखाविनोदिनी ॥ 68 ॥

कर्मरेखामोहकरी कर्मकीर्तिपरायणा ।
कर्मविद्या कर्मसारा कर्माधारा च कर्मभूः ॥ 69 ॥

कर्मकारी कर्महारी कर्मकौतुकसुंदरी ।
कर्मकाली कर्मतारा कर्मच्छिन्ना च कर्मदा ॥ 70 ॥

कर्मचांडालिनी कर्मवेदमाता च कर्मभूः ।
कर्मकांडरतानंता कर्मकांडानुमानिता ॥ 71 ॥

कर्मकांडपरीणाहा कमठी कमठाकृतिः ।
कमठाराध्यहृदया कमठाकंठसुंदरी ॥ 72 ॥

कमठासनसंसेव्या कमठी कर्मतत्परा ।
करुणाकरकांता च करुणाकरवंदिता ॥ 73 ॥

कठोरकरमाला च कठोरकुचधारिणी ।
कपर्दिनी कपटिनी कठिना कंकभूषणा ॥ 74 ॥

करभोरूः कठिनदा करभा करभालया ।
कलभाषामयी कल्पा कल्पना कल्पदायिनी ॥ 75 ॥

कमलस्था कलामाला कमलास्या क्वणत्प्रभा ।
ककुद्मिनी कष्टवती करणीयकथार्चिता ॥ 76 ॥

कचार्चिता कचतनुः कचसुंदरधारिणी ।
कठोरकुचसंलग्ना कटिसूत्रविराजिता ॥ 77 ॥

कर्णभक्षप्रिया कंदा कथा कंदगतिः कलिः ।
कलिघ्नी कलिदूती च कविनायकपूजिता ॥ 78 ॥

कणकक्षानियंत्री च कश्चित्कविवरार्चिता ।
कर्त्री च कर्तृकाभूषा कारिणी कर्णशत्रुपा ॥ 79 ॥

करणेशी करणपा कलवाचा कलानिधिः ।
कलना कलनाधारा कारिका करका करा ॥ 80 ॥

कलज्ञेया कर्कराशिः कर्कराशिप्रपूजिता ।
कन्याराशिः कन्यका च कन्यकाप्रियभाषिणी ॥ 81 ॥

कन्यकादानसंतुष्टा कन्यकादानतोषिणी ।
कन्यादानकरानंदा कन्यादानग्रहेष्टदा ॥ 82 ॥

कर्षणा कक्षदहना कामिता कमलासना ।
करमालानंदकर्त्री करमालाप्रतोषिता ॥ 83 ॥

करमालाशयानंदा करमालासमागमा ।
करमालासिद्धिदात्री करमालाकरप्रिया ॥ 84 ॥

करप्रिया कररता करदानपरायणा ।
कलानंदा कलिगतिः कलिपूज्या कलिप्रसूः ॥ 85 ॥

कलनादनिनादस्था कलनादवरप्रदा ।
कलनादसमाजस्था कहोला च कहोलदा ॥ 86 ॥

कहोलगेहमध्यस्था कहोलवरदायिनी ।
कहोलकविताधारा कहोलृषिमानिता ॥ 87 ॥

कहोलमानसाराध्या कहोलवाक्यकारिणी ।
कर्तृरूपा कर्तृमयी कर्तृमाता च कर्तरी ॥ 88 ॥

कनीया कनकाराध्या कनीनकमयी तथा ।
कनीयानंदनिलया कनकानंदतोषिता ॥ 89 ॥

कनीयककरा काष्ठा कथार्णवकरी करी ।
करिगम्या करिगतिः करिध्वजपरायणा ॥ 90 ॥

करिनाथप्रिया कंठा कथानकप्रतोषिता ।
कमनीया कमनका कमनीयविभूषणा ॥ 91 ॥

कमनीयसमाजस्था कमनीयव्रतप्रिया ।
कमनीयगुणाराध्या कपिला कपिलेश्वरी ॥ 92 ॥

कपिलाराध्यहृदया कपिलाप्रियवादिनी ।
कहचक्रमंत्रवर्णा कहचक्रप्रसूनका ॥ 93 ॥

केईलह्रींस्वरूपा च केईलह्रींवरप्रदा ।
केईलह्रींसिद्धिदात्री केईलह्रींस्वरूपिणी ॥ 94 ॥

केईलह्रींमंत्रवर्णा केईलह्रींप्रसूकला ।
केवर्गा कपाटस्था कपाटोद्घाटनक्षमा ॥ 95 ॥

कंकाली च कपाली च कंकालप्रियभाषिणी ।
कंकालभैरवाराध्या कंकालमानसंस्थिता ॥ 96 ॥

कंकालमोहनिरता कंकालमोहदायिनी ।
कलुषघ्नी कलुषहा कलुषार्तिविनाशिनी ॥ 97 ॥

कलिपुष्पा कलादाना कशिपुः कश्यपार्चिता ।
कश्यपा कश्यपाराध्या कलिपूर्णकलेवरा ॥ 98 ॥

कलेवरकरी कांची कवर्गा च करालका ।
करालभैरवाराध्या करालभैरवेश्वरी ॥ 99 ॥

कराला कलनाधारा कपर्दीशवरप्रदा ।
कपर्दीशप्रेमलता कपर्दिमालिकायुता ॥ 100 ॥

कपर्दिजपमालाढ्या करवीरप्रसूनदा ।
करवीरप्रियप्राणा करवीरप्रपूजिता ॥ 101 ॥

कर्णिकारसमाकारा कर्णिकारप्रपूजिता ।
करीषाग्निस्थिता कर्षा कर्षमात्रसुवर्णदा ॥ 102 ॥

कलशा कलशाराध्या कषाया करिगानदा ।
कपिला कलकंठी च कलिकल्पलता मता ॥ 103 ॥

कल्पमाता कल्पलता कल्पकारी च कल्पभूः ।
कर्पूरामोदरुचिरा कर्पूरामोदधारिणी ॥ 104 ॥

कर्पूरमालाभरणा कर्पूरवासपूर्तिदा ।
कर्पूरमालाजयदा कर्पूरार्णवमध्यगा ॥ 105 ॥

कर्पूरतर्पणरता कटकांबरधारिणी ।
कपटेश्ववरसंपूज्या कपटेश्वररूपिणी ॥ 106 ॥

कटुः कपिध्वजाराध्या कलापपुष्पधारिणी ।
कलापपुष्परुचिरा कलापपुष्पपूजिता ॥ 107 ॥

क्रकचा क्रकचाराध्या कथंब्रूमा करालता ।
कथंकारविनिर्मुक्ता काली कालक्रिया क्रतुः ॥ 108 ॥

कामिनी कामिनीपूज्या कामिनीपुष्पधारिणी ।
कामिनीपुष्पनिलया कामिनीपुष्पपूर्णिमा ॥ 109 ॥

कामिनीपुष्पपूजार्हा कामिनीपुष्पभूषणा ।
कामिनीपुष्पतिलका कामिनीकुंडचुंबना ॥ 110 ॥

कामिनीयोगसंतुष्टा कामिनीयोगभोगदा ।
कामिनीकुंडसम्मग्ना कामिनीकुंडमध्यगा ॥ 111 ॥

कामिनीमानसाराध्या कामिनीमानतोषिता ।
कामिनीमानसंचारा कालिका कालकालिका ॥ 112 ॥

कामा च कामदेवी च कामेशी कामसंभवा ।
कामभावा कामरता कामार्ता काममंजरी ॥ 113 ॥

काममंजीररणिता कामदेवप्रियांतरा ।
कामकाली कामकला कालिका कमलार्चिता ॥ 114 ॥

कादिका कमला काली कालानलसमप्रभा ।
कल्पांतदहना कांता कांतारप्रियवासिनी ॥ 115 ॥

कालपूज्या कालरता कालमाता च कालिनी ।
कालवीरा कालघोरा कालसिद्धा च कालदा ॥ 116 ॥

कालांजनसमाकारा कालंजरनिवासिनी ।
कालृद्धिः कालवृद्धिः कारागृहविमोचिनी ॥ 117 ॥

कादिविद्या कादिमाता कादिस्था कादिसुंदरी ।
काशी कांची च कांचीशा काशीशवरदायिनी ॥ 118 ॥

क्रींबीजा चैव क्रीं बीजहृदयाय नमः स्मृता ।
काम्या काम्यगतिः काम्यसिद्धिदात्री च कामभूः ॥ 119 ॥

कामाख्या कामरूपा च कामचापविमोचिनी ।
कामदेवकलारामा कामदेवकलालया ॥ 120 ॥

कामरात्रिः कामदात्री कांताराचलवासिनी ।
कामरूपा कामगतिः कामयोगपरायणा ॥ 121 ॥

कामसम्मर्दनरता कामगेहविकाशिनी ।
कालभैरवभार्या च कालभैरवकामिनी ॥ 122 ॥

कालभैरवयोगस्था कालभैरवभोगदा ।
कामधेनुः कामदोग्ध्री काममाता च कांतिदा ॥ 123 ॥

कामुका कामुकाराध्या कामुकानंदवर्धिनी ।
कार्तवीर्या कार्तिकेया कार्तिकेयप्रपूजिता ॥ 124 ॥

कार्या कारणदा कार्यकारिणी कारणांतरा ।
कांतिगम्या कांतिमयी कांत्या कात्यायनी च का ॥ 125 ॥

कामसारा च काश्मीरा काश्मीराचारतत्परा ।
कामरूपाचाररता कामरूपप्रियंवदा ॥ 126 ॥

कामरूपाचारसिद्धिः कामरूपमनोमयी ।
कार्तिकी कार्तिकाराध्या कांचनारप्रसूनभूः ॥ 127 ॥

कांचनारप्रसूनाभा कांचनारप्रपूजिता ।
कांचरूपा कांचभूमिः कांस्यपात्रप्रभोजिनी ॥ 128 ॥

कांस्यध्वनिमयी कामसुंदरी कामचुंबना ।
काशपुष्पप्रतीकाशा कामद्रुमसमागमा ॥ 129 ॥

कामपुष्पा कामभूमिः कामपूज्या च कामदा ।
कामदेहा कामगेहा कामबीजपरायणा ॥ 130 ॥

कामध्वजसमारूढा कामध्वजसमास्थिता ।
काश्यपी काश्यपाराध्या काश्यपानंददायिनी ॥ 131 ॥

कालिंदीजलसंकाशा कालिंदीजलपूजिता ।
कादेवपूजानिरता कादेवपरमार्थदा ॥ 132 ॥

कर्मणा कर्मणाकारा कामकर्मणकारिणी ।
कार्मणत्रोटनकरी काकिनी कारणाह्वया ॥ 133 ॥

काव्यामृता च कालिंगा कालिंगमर्दनोद्यता ।
कालागुरुविभूषाढ्या कालागुरुविभूतिदा ॥ 134 ॥

कालागुरुसुगंधा च कालागुरुप्रतर्पणा ।
कावेरीनीरसंप्रीता कावेरीतीरवासिनी ॥ 135 ॥

कालचक्रभ्रमाकारा कालचक्रनिवासिनी ।
कानना काननाधारा कारुः कारुणिकामयी ॥ 136 ॥

कांपिल्यवासिनी काष्ठा कामपत्नी च कामभूः ।
कादंबरीपानरता तथा कादंबरी कला ॥ 137 ॥

कामवंद्या च कामेशी कामराजप्रपूजिता ।
कामराजेश्वरीविद्या कामकौतुकसुंदरी ॥ 138 ॥

कांबोजजा कांछिनदा कांस्यकांचनकारिणी ।
कांचनाद्रिसमाकारा कांचनाद्रिप्रदानदा ॥ 139 ॥

कामकीर्तिः कामकेशी कारिका कांतराश्रया ।
कामभेदी च कामार्तिनाशिनी कामभूमिका ॥ 140 ॥

कालनिर्णाशिनी काव्यवनिता कामरूपिणी ।
कायस्थाकामसंदीप्तिः काव्यदा कालसुंदरी ॥ 141 ॥

कामेशी कारणवरा कामेशीपूजनोद्यता ।
कांचीनूपुरभूषाढ्या कुंकुमाभरणान्विता ॥ 142 ॥

कालचक्रा कालगतिः कालचक्रमनोभवा ।
कुंदमध्या कुंदपुष्पा कुंदपुष्पप्रिया कुजा ॥ 143 ॥

कुजमाता कुजाराध्या कुठारवरधारिणी ।
कुंजरस्था कुशरता कुशेशयविलोचना ॥ 144 ॥

कुनटी कुररी कुद्रा कुरंगी कुटजाश्रया ।
कुंभीनसविभूषा च कुंभीनसवधोद्यता ॥ 145 ॥

कुंभकर्णमनोल्लासा कुलचूडामणिः कुला ।
कुलालगृहकन्या च कुलचूडामणिप्रिया ॥ 146 ॥

कुलपूज्या कुलाराध्या कुलपूजापरायणा ।
कुलभूषा तथा कुक्षिः कुररीगणसेविता ॥ 147 ॥

कुलपुष्पा कुलरता कुलपुष्पपरायणा ।
कुलवस्त्रा कुलाराध्या कुलकुंडसमप्रभा ॥ 148 ॥

कुलकुंडसमोल्लासा कुंडपुष्पपरायणा ।
कुंडपुष्पप्रसन्नास्या कुंडगोलोद्भवात्मिका ॥ 149 ॥

कुंडगोलोद्भवाधारा कुंडगोलमयी कुहूः ।
कुंडगोलप्रियप्राणा कुंडगोलप्रपूजिता ॥ 150 ॥

कुंडगोलमनोल्लासा कुंडगोलबलप्रदा ।
कुंडदेवरता क्रुद्धा कुलसिद्धिकरा परा ॥ 151 ॥

कुलकुंडसमाकारा कुलकुंडसमानभूः ।
कुंडसिद्धिः कुंडृद्धिः कुमारीपूजनोद्यता ॥ 152 ॥

कुमारीपूजकप्राणा कुमारीपूजकालया ।
कुमारीकामसंतुष्टा कुमारीपूजनोत्सुका ॥ 153 ॥

कुमारीव्रतसंतुष्टा कुमारीरूपधारिणी ।
कुमारीभोजनप्रीता कुमारी च कुमारदा ॥ 154 ॥

कुमारमाता कुलदा कुलयोनिः कुलेश्वरी ।
कुललिंगा कुलानंदा कुलरम्या कुतर्कधृक् ॥ 155 ॥

कुंती च कुलकांता च कुलमार्गपरायणा ।
कुल्ला च कुरुकुल्ला च कुल्लुका कुलकामदा ॥ 156 ॥

कुलिशांगी कुब्जिका च कुब्जिकानंदवर्धिनी ।
कुलीना कुंजरगतिः कुंजरेश्वरगामिनी ॥ 157 ॥

कुलपाली कुलवती तथैव कुलदीपिका ।
कुलयोगेश्वरी कुंडा कुंकुमारुणविग्रहा ॥ 158 ॥

कुंकुमानंदसंतोषा कुंकुमार्णववासिनी ।
कुंकुमाकुसुमप्रीता कुलभूः कुलसुंदरी ॥ 159 ॥

कुमुद्वती कुमुदिनी कुशला कुलटालया ।
कुलटालयमध्यस्था कुलटासंगतोषिता ॥ 160 ॥

कुलटाभवनोद्युक्ता कुशावर्ता कुलार्णवा ।
कुलार्णवाचाररता कुंडली कुंडलाकृतिः ॥ 161 ॥

कुमतिश्च कुलश्रेष्ठा कुलचक्रपरायणा ।
कूटस्था कूटदृष्टिश्च कुंतला कुंतलाकृतिः ॥ 162 ॥

कुशलाकृतिरूपा च कूर्चबीजधरा च कूः ।
कुं कुं कुं कुं शब्दरता क्रुं क्रुं क्रुं क्रुं परायणा ॥ 163 ॥

कुं कुं कुं शब्दनिलया कुक्कुरालयवासिनी ।
कुक्कुरासंगसंयुक्ता कुक्कुरानंतविग्रहा ॥ 164 ॥

कूर्चारंभा कूर्चबीजा कूर्चजापपरायणा ।
कुलिनी कुलसंस्थाना कूर्चकंठपरागतिः ॥ 165 ॥

कूर्चवीणाभालदेशा कूर्चमस्तकभूषिता ।
कुलवृक्षगता कूर्मा कूर्माचलनिवासिनी ॥ 166 ॥

कुलबिंदुः कुलशिवा कुलशक्तिपरायणा ।
कुलबिंदुमणिप्रख्या कुंकुमद्रुमवासिनी ॥ 167 ॥

कुचमर्दनसंतुष्टा कुचजापपरायणा ।
कुचस्पर्शनसंतुष्टा कुचालिंगनहर्षदा ॥ 168 ॥

कुमतिघ्नी कुबेरार्च्या कुचभूः कुलनायिका ।
कुगायना कुचधरा कुमाता कुंददंतिनी ॥ 169 ॥

कुगेया कुहराभासा कुगेयाकुघ्नदारिका ।
कीर्तिः किरातिनी क्लिन्ना किन्नरा किन्नरीक्रिया ॥ 170 ॥

क्रींकारा क्रींजपासक्ता क्रीं हूं स्त्रीं मंत्ररूपिणी ।
किर्मीरितदृशापांगी किशोरी च किरीटिनी ॥ 171 ॥

कीटभाषा कीटयोनिः कीटमाता च कीटदा ।
किंशुका कीरभाषा च क्रियासारा क्रियावती ॥ 172 ॥

कींकींशब्दपरा क्लां क्लीं क्लूं क्लैं क्लौं मंत्ररूपिणी ।
कां कीं कूं कैं स्वरूपा च कः फट् मंत्रस्वरूपिणी ॥ 173 ॥

केतकीभूषणानंदा केतकीभरणान्विता ।
कैकदा केशिनी केशी केशिसूदनतत्परा ॥ 174 ॥

केशरूपा केशमुक्ता कैकेयी कौशिकी तथा ।
कैरवा कैरवाह्लादा केशरा केतुरूपिणी ॥ 175 ॥

केशवाराध्यहृदया केशवासक्तमानसा ।
क्लैब्यविनाशिनी क्लैं च क्लैं बीजजपतोषिता ॥ 176 ॥

कौशल्या कोशलाक्षी च कोशा च कोमला तथा ।
कोलापुरनिवासा च कोलासुरविनाशिनी ॥ 177 ॥

कोटिरूपा कोटिरता क्रोधिनी क्रोधरूपिणी ।
केका च कोकिला कोटिः कोटिमंत्रपरायणा ॥ 178 ॥

कोट्यनंतमंत्रयुक्ता कैरूपा केरलाश्रया ।
केरलाचारनिपुणा केरलेंद्रगृहस्थिता ॥ 179 ॥

केदाराश्रमसंस्था च केदारेश्वरपूजिता ।
क्रोधरूपा क्रोधपदा क्रोधमाता च कौशिकी ॥ 180 ॥

कोदंडधारिणी क्रौंचा कौशल्या कौलमार्गगा ।
कौलिनी कौलिकाराध्या कौलिकागारवासिनी ॥ 181 ॥

कौतुकी कौमुदी कौला कौमारी कौरवार्चिता ।
कौंडिन्या कौशिकी क्रोधज्वालाभासुररूपिणी ॥ 182 ॥

कोटिकालानलज्वाला कोटिमार्तंडविग्रहा ।
कृत्तिका कृष्णवर्णा च कृष्णा कृत्या क्रियातुरा ॥ 183 ॥

कृशांगी कृतकृत्या च क्रः फट् स्वाहा स्वरूपिणी ।
क्रौं क्रौं हूं फट् मंत्रवर्णा क्रीं ह्रीं हूं फट् नमः स्वधा ॥ 184 ॥

क्रीं क्रीं ह्रीं ह्रीं तथा ह्रूं ह्रूं फट् स्वाहा मंत्ररूपिणी ।
इति श्रीसर्वसाम्राज्यमेधानाम सहस्रकम् ॥ 185 ॥

इति श्रीरुद्रयामले कालीतंत्रे ककारादि श्री काली सहस्रनाम स्तोत्रम् ।